يوسف، 58 عاماً

اسمي يوسف، فلسطيني سوري. من مواليد ١٩٥٧. اتيت إلى لبنان مع عائلتي في ١٣/٠٩/٢٠١٢ طلبا للأمان. عندما بدؤوا بقمع المظاهرات في درعا بدؤوا بالغاز المسيل للدموع والمياه ثم تطور الحال لاطلاق الرصاص الحي وبعدها القذائف، كل هذا دفعني للخروج مع عائلتي من سورية. ذهبنا أولا إلى دمشق وبقينا سبعة عشر يوما بعدها اتينا عن طريق المصنع بأوراقنا النظامية إلى العرمون وبقينا عند أختي ضيوفا قرابة الشهرين، ثم اتينا إلى مخيم شاتيلا واستأجرنا منزل صغير لمدة ستة أشهر. بعدها انتقلنا إلى مخيم برج البراجنة "جيت لهون اوسع واريح واهدى والي سنتين وبدفع اجار البيت على الله.. كنت معتمد على قرايبين يبعتولي مساعدة بس لاقوا الأزمة طولت.. اعتمادنا حاليا على الأونروا والجمعيات الخيرية.. وانا كفيف بعين والتانية خيالات.. بسبب السكري.. انا يأست من الطب وخسرت نظري بالعملية وانا مريض سكري من 23 سنة والأنروا متكفلة السكري والضغط ازا اي شي تاني بيتملصوا وكتير غالي لبنان…"

عندما غادرنا لم اجلب الكثير. لاحقا اُرسل إلي من هناك ما طلبت من الأغراض. حرصت على حصولي على شيئين مهمين جدا، كان والدي هو من جلبهما من فلسطين. اولهما جواز سفر فلسطيني اصدار ١٩٤٥، وثانيهما فراش أرض من صوف غنمنا في فلسطين. "جواز السفر بتثبت حقي بفلسطين.. والفرشة نفس الشي من ريحة غنمنا بفلسطين ووراق الطابو هوية فلسطين واثبات انو هاي ارضي وارض جدي…"

الآن بات بقاءنا هنا صعب جدا بسبب القانون الجديد. "انا كنت سابقا فدائي بلبنان وكنت مفكر اني بعرفها وخادم فيها.. تفاجئت انو الوضع سيء بلبنان وما في صدر حنين متل زمان.. انا جاي هلأ من شاتيلا وخايف حاجز يوقفني انا فتت نظامي بس هلأ صرت غير نظامي.. ليش نجدد وراق ونحنا نازحين ليه ما بيعطونا ورقة لتنتهي الأزمة.. لازم يكون في بند طوارئ ويعاملونا على اساسه.. نحنا عرب والعرب شعارهم اغاثة الملهوف اي وين دعسو ع رقابنا... انت ما سألتني عن الأجار.. 450$ ودخلي صفر وانا بنتي اسلام وقت داومت بالمركز تطوعا بلا مقابل غمضت عيوني وقلتلها طبعا.. هلأ صاروا يعطوها ومسكجة عليي.. ابني الكبير محمود صرله 9 شهور بلا شغل.. عنده مرة وولدين.. ابني الصغير عمره 14 سنة عم يشتغل ب 50 الف بالشهر.. ابني التاني متجوز بياخد 200$ كل 15 يوم.. منلمهم مع بعض ومنتكاتف ومنلم بعض .. الاونروا بتعطيني 200$ .. بدي اقارنلك ياها اني كل ما ادفع شهر هون بقيمة 3 سنين واربع شهور بدرعا .. بأجار شهرين بشتري بيت مبحبح... لما يجي الفلسطيني ع لبنان بيوقف على كوة مكتوب عليها اجانب؟! ابني ومرته تكلبشو بالحديد من كم يوم على حاجز الغبيري لأن منتهية الها يومين الإقامة وهنن اللي ما عم يجددولنا.. هلأ الو شهرين وراقه بالأمن العام وما عم يجددوله وصار متدين 4000$ ليسافر واذا ما عطوه جواز سفره خلال يومين بيخسر كل شي واذا ما سافر من وين بدو يسد الدينات ؟! الفلسطيني بسوريا اخذ حقوق اكتر من السوري.. بغض النظر عن موقفنا من النظام اللي ظلم بس اللي عم يحارب النظام احقر واوسخ واكلب…" 

---

http://lb.boell.org/ar/mrd-lmnfعودة الى المعرض