عبد الناصر، 47 عاماً

أنا عبد الناصر، فلسطيني سوري. والداي نزحوا من فلسطين، طبريا عام ١٩٤٨. ولدت أنا في مخيم اليرموك، سورية عام ١٩٦٨. “بالأزمة اللي صارت بسورية انا انخطف ابني وضل 10 ايام ودفعت مبلغ هائل من المصاري.. انا كان عندي سوبر ماركت بالمخيم وانسرق.. رجعوا هددوا بخطف ابني فاضطريت ابعتهن على لبنان.. مو ع الأردن لأنو منعو الفلسطيني السوري يفوت.. نحنا الاربعة مرضى قلب، أنا وابني ومرتي وبنتي…” عائلتي اتت عن طريق الحدود النظامية إلى مخيم برج البراجنة، أما أنا تبعتهم لاحقا. “لحقت مرتي وولادي ب 18/12/2012 واجيت تهريب لأن عليي اشكال منع مغادرة وانطلبت بسبب مشكل ب 2009 لأحد فروع المخابرات.. اجيت عن طريق الجبال لوحدي وكان في عاصفة ثلجية وشفت الموت من الوحوش والبرد ونمت بالمغر وكان معي جاكيت مزعتها وعملت منها مشاعل وقضيت للحمدالله لوصلت على لبنان واجيت على مخيم برج البراجنة ودورت على عيلتي شي اسبوعين تلاتة لحتى اندليت وما كان معي تلفون ضاع واول ما اجيت نمت قدام جامع الفرقان على كرتونة 18 يوم كنا بشهر 12 عز دين البرد.. انا بعاني هلأ من البروستات والاونروا ما قبلت تحكمني لأني مو فايت نظامي.. لحتى احد الفصائل شد على الاونروا.. وهلأ ما بقدر اتحرك لأني مو نظامي .. وما بقدر اجدد نحنا 7 ب 200$ يعني 1400$ من وين .. يوم منام اكلين يوم لأ..... كنت افطر برمضان على كاسة المي انا وابني لحد ما دريوا الجيران بوضعي وصاروا يجيبولي كل يوم أكل.. الأونروا بتدفع لكل نفر باليوم 1$ بدك تدفع الأجار وتوكل وتنكسي وتطبب فيهن !! حق ربطة الخبز 1$ .. عندي بنتي اجت من سوريا هي وابنها. وجوزها انفقد من اول الأزمة............... السفرة عم تكلفنا 5 او 6 الاف $ البحر ما بدو ايانا عم يغرقنا.. صحراء ليبيا فيها مئات جثث الفلسطينية المهاجرين.... انا انذليت هون الي سنة ونص بقدرش اطلع برا المخيم  ليش ؟! ............ ما عندي غير هل الولد بيشتغل عندي..”

كنت املك بناء بحاله، خمس طوابق، تدمّر بالكامل. احزن على شيئين لم اجلبهما “مفتاح بيت جدي بفلسطين امني عليه جدي.. المفتاح اللي كنت اطلع عليه اشوف شريط فيديو وانفتح فلسطين .. وقنينة الغاز اللي كسرتلي كتفي بمجدل شمس..” لكني جلبت معي، “العقال والحطة لأبوي كانت مضبوبة شي 15 سنة.. ومعي رسمة رسمتها ابنتي فلسطين من 5 سنين كانت معي بالجزدان ولسا معي (مكتوب عليها : سورية وفلسطين مسيرة وشعب واحد)..."

---

عودة الى المعرض